“ለአርሶ አደሩ አሁን ካልደረስን መቼም አንደርስለትም።” የሰሜን ሸዋ ግብርና መምሪያ

በዞኑ እስከ ትናንት ጥቅምት 2/2013 ዓ.ም ድረስ በዘጠኝ ወረዳዎች በ24 ቀበሌዎቸ ተከስቷል፡፡ ወደ 11 ሺህ የክታር መሬት መሸፈኑንም አንስተዋል፡፡ የበርሃ አንበጣን ለመከላከል ቀደም ብሎ ዝግጅት በመደረጉ ከ4 ሺህ ሄክታር በላይ የሚሆነውን በባህላዊ እና በዘመናዊ መንገድ መከላከል ተችሏል፡፡ ባለሙያዎች እና ኅብረተሰቡ ከምሽት 1፡00 ጀምሮ በመብራት ያታገዘ ርጭት ማድረጋቸው የመከላከል እንቅስቃሴውን የተሻለ አድርጎታል፡፡

ከኦሮሞ ብሔረሰብ አስተዳደር እና ከአፋር ክልል አጎራባች ወረዳዎች ጋር በመናበብ እየተሠራ ቢሆንም በቀወት፣ ምንጃር ሸንኮራና ጣርማበር ወረዳዎች በ746 ሄክታር መሬት በሰብል ላይ ጉደዳት ማድረገሱን አስታውቀዋል፡፡ በሁሉም ወረዳዎች የደረሱ ሰብሎችን መሰብሰብ እንደሚገባም መምሪያ ኃላፊዋ አሳስበዋል፡፡ በተለይም የክስተቱ የሥጋት ቦታዎችን በመለየት ከፍተኛ ርብርብ እንዲደረግ አሳስበዋል፡፡

በመከላከል ሂደቱ የፌዴራል እና ክልሉ መንግሥታት ጥሩ ድጋፍ ማድረጋቸውም ተነስቷል፡፡ ወይዘሮ መሠረት የወረርሽኙ ስርጭት የሚጨምር ከሆነ የአውሮፕላን ርጭት ለማድረግ የተጀመረ ተግባር መኖሩንም ተናግረዋል፡፡ ነገር ግን የተሽከርካሪ እጥረት እና የመልክአ ምድሩ አለመመቸት በመኪና ለማሰስ እና ርጭት ለማድረግ ችግር ሆኗል፡፡ ለባለሙያዎች የአልባሳት አቅርቦት አለመኖሩም ተጠቅሷል፡፡

የአንበጣ መንጋው ሰብል ላይ እንዳያርፍ መከላከል፣ የደረሱ ሰብሎችን መሰብሰብ፣ በተረራራማ አካባቢዎች ካረፈ በኋላም ምሽት ላይ በመብራት ታግዞ ርጭት ማድረግ ተጠናክሮ እንዲቀጥል መክረዋል፡፡ አርሶ አደሩ ማሳውን በንቃት እንዲከታተልም አሳስበዋል፡፡

ዘጋቢ፡- ደጀኔ በቀለ