የበርሃ አንበጣ መከላከል ሥራው ተጠናክሮ መቀጠሉን የግብርና ሚኒስቴር አስታወቀ፡፡

መንግሥት የበርሃ አንበጣን መታገል ከጀመረ ከአምስት አስከ ስድስት ወራት እንደሆነው አቶ ወንዳለ ገልጸዋል፡፡ የመንጋው ስፋት ሊኖር የቻለው ከውጭ ሀገራት በአዲስ መልኩ የሚገባ የአንበጣ መንጋ በመኖሩ መሆኑንም ጠቁመዋል፡፡ የተከሰተው የበርሃ አንበጣ ለመቆጣጠር እንዲቻል እስከ ጥቅምት 4/2013 ዓ.ም አራት የመርጫ አውሮፕላኖች ከውጭ ወደ ሀገር እንደሚገቡም አስታውቀዋል፡፡ ሚኒስትር ዴኤታው እንደገለጹት አንድ አውሮፕላን በቀን 4 ሺህ ሄክታር ስፋት ያለውን አካባቢ የመርጨት አቅም አለው፤ እናም በቅርቡ የሚጠበቁት አውሮፕላኖች ከተሰማሩ መንጋውን ሙሉ በሙሉ መቆጣጠር ይቻላል፡፡

በአማራ ክልል በ125 ቀበሌዎች እና በ4 ዞኖች የበርሃ አንበጣ መንጋ ተከስቷል፡፡ በመንጋው ምክንያት ለተጎዱ አርሶ አደሮች ድጋፍ የማድረስ ሥራ እንደሚሠራ፣ በሁለተኛ ዙርም ቋሚ በሆነ መልኩ ወደ መስኖ ልማት በማስገባት የሚጠናከሩ እንደሆነ ሚንስትር ዴኤታው ጠቁመዋል፡፡ “መንጋውን አሁን ባለበት ቦታ ማስቆም ታላቅ ሥራ ነው፡፡ ይህ ካልሆነ በመላውን የሀገሪቱ ክፍል ሊያጠፋ ይችላል” ብለዋል አቶ ወንዳለ፡፡ አንበጣውን በመታገል ከአርሶ አደሩ ጋር እየሠሩ መሆናቸውን እና መጥፋቱ አስኪረጋገጥ ያላሰለሰ ጥረት እንደሚያደርጉም አረጋግጠዋል፡፡

ዘጋቢ፡- ብሩክ ተሾመ