ሐይቁ በመሙላቱ ወደውጭ የተገፋው የእምቦጭ አረም ተመልሶ እንዳይገባ የሰው ኃይል ሊሠማራ ነው፡፡

ወደ ማሳ የወጣውን የእምቦጭ አረም ሙሉ በሙሉ ማስቀረት ከተቻለ ቀጣዩ ሥራ ተንጠባጥቦ የቀረውን መልቀም ነው፡፡ ወደ ማሳ የወጣውን ባለበት ማስቀረት ካልተቻለ ግን በማሳ እና በሐይቁ ውስጥ በፍጥነት እንደሚራባ ተመላክቷል፡፡

በመሆኑም የውኃ መጠኑ በሚቀንስ ጊዜ አረሙ ወደ ሐይቁ ተመልሶ እንዳይገባ ባለበት ለማስቀረት እንቅስቃሴ ተጀምሯል፡፡ ከሚቀጥለው ሳምንት ጀምሮ ሰው መግባት እስከሚችልባቸው ቦታዎች ድረስ ሥምሪት እንደሚደረግም የኤጄንሲው ሥራ አስኪያጅ አያሌው ወንዴ (ዶክተር) አስታውቀዋል፡፡

በዚህ ጊዜም በፎገራ፣ ሊቦ ከምከም እና ደምቢያ ወረዳዎች በሚገኙ በ30 ቀበሌዎች ሠራተኞችን የሚያስተባብር ሰው የመሟላት ተግባር እየተከናወነ እንደሚገኝ ነው የተናገሩት፡፡ አስተባባሪዎቹም ከወረዳ እና ከቀበሌ አስተዳዳሪዎች ጋር ወደ ተግባር የሚገቡ ይሆናል፡፡

እንደሥራ አስኪያጁ ገለጻ ጣና ሞልቶ በፈሰሰባቸው አካባቢዎች አረሙን ለማስወገድ በቂ የሰው ኃይል ይገኛል፡፡ መልካም አጋጣሚውን በመጠቀምም በተቻለ ፍጥነት ወደ ተግባር የሚገባ ይሆናል፡፡ እንደ ዶክተር አያሌው ማብራሪያ ሠራተኞቹ አረሙን በመሰብሰብ አንድ ቦታ ያከማቹታል፤ ከተሰበሰበ በኋላም በበጋ ጊዜ የሚቃጠል ይሆናል፡፡

ሐይቁ ሞልቶ ባልፈሰሰባቸው አካባቢዎች ያለውን የእቦጭ አረም በማሽን ለማስወገድ የክልሉ እና የፌዴራል መንግሥታት የተግባር ድርሻ መለየቱንም አስታውቀዋል፡፡ ይሁን እንጂ ለጉዳዩ እየሰጡት ያለው ምላሽ በችግሩ አሳሳቢነት ልክ አለመሆኑን ተናግረዋል። ኤጂንሲው ከጉዳዩ ጋር በተያያዘ ዛሬ ከፌዴራል መንግሥቱ ጋር ውይይት እንደሚያደርግም ለማወቅ ተችሏል፡፡

ዘጋቢ፡- ደጀኔ በቀለ
ፎቶ፡- ከፋይል

ተጨማሪ መረጃዎችን ከአብመድ የተለያዩ የመረጃ መረቦች ቀጣዮቹን ሊንኮች በመጫን ማግኘት ትችላላችሁ፡፡