የኮሮናቫይረስ ስርጭት እየጨመረ ሲሄድ በተቃራኒው የሚጓዘው የማኅበረሰቡ መዘናጋት እንዳሳሰበው የክልሉ ጤሮ ቢሮ አስታወቀ።

የአማራ ክልል ጤና ቢሮም በቀጣይ ትምህርት ቤቶች ሲከፈቱ የበሽታው ስርጭት እንዳይስፋፋ እና ኅብረተሰቡ የሚያሳየው መዘናጋት የወረርሽኙን ስርጭት እንዳያባብሰው የሃይማኖት አባቶች ለኅብረተሰቡ አሁንም ማስተማር እንዳለባቸው አሳስቧል።

የክልሉ ጤና ቢሮ ከሁሉም ዞኖች ከተውጣጡ የሃይማኖት ተቋማት ጉባኤ ጋር በደብረ ታቦር ከተማ አስተዳደር ውይይት አካሂዷል።

የውይይቱ ተሳታፊዎችም አንዳንድ የሃይማኖት አባቶች እና ከኅብረተሰቡ ውስጥም “ኮሮና የለም፣ ለፖለቲካ ማስፈፀሚያ ነው” የሚሉ የተሳሳቱ አመለካከቶች መኖራቸው ስርጭቱ እንዲስፋፋ አድርጎታል ብለዋል። በቀጣይም ለኅብረተሰቡ ግንዛቤ በመፍጠር በኩል የሃይማኖት አባቶች ያላሳለሰ ጥረት በማድረግ ኃላፊነታቸውን መውጣት እንዳለባቸውም ጠቁመዋል።

የጤና ባለሙያዎች እና የመንግሥት የሥራ ኃላፊዎች የመከላከያ መንገዶችን በመተግበር አርዓያ ሊሆኑ እንደሚገባም የሃይማኖት አባቶች መክረዋል።

“ኅብረተሰቡ ‘ኮሮና የለም’ ከሚል አስተሳሰብ ወጥቶ እራሱን እና ወገኑን ሊጠብቅ ይገባል” ያሉት የሃይማኖት አባቶች መንግሥትም ሕግን በማስከበር በኩል ኃላፊነቱን ሊወጣ እንደሚገባም አሳስበዋል።

ዘጋቢ፦ አማረ ሊቁ – ከደብረታቦር